خرجوا واحد ورا التاني، مكسورين، مش عشان خسروني، لكن عشان خسروا المصلحة. وقفت ورا الباب وسمعت صوت ولاء وهي بتزعق لهاني في الطرقة أدينا خسرنا كل حاجة بسبب لسانك الزفر!دخلت الصالون، قعدت في الهدوء اللي كنت محتاجاه من زمان.
تليفوني بدأ يرن.. رسايل اعتذار، رسايل تهديد، ورسايل استعطاف. بس أنا كنت مشغولة بحاجة تانية خالص.. كنت بمسح أرقامهم واحد ورا التاني.
ليلة الثلاثاء اللي بدأت بخيانة، انتهت بنصر بارد.. بس الحرب الحقيقية بدأت تاني يوم الصبح.
الساعة كانت 9 الصبح لما صحيت على صوت خبط رزيق على الباب. مكنتش محتاجة أبص من العين السحرية عشان أعرف مين؛ نفس الخبطة اللي كنت بجري عليها زمان بلهفة، دلوقت بقيت بسمعها وكأنها طوب بيترمى في مية عكرة.
فتحت الباب ببرود، لقيت هاني ووراه ولاء، ووشوشهم
باهتة من قلة النوم. هاني دخل من غير استئذان
وهو بيزعق
أنتِ عارفة إن النهاردة آخر ميعاد لقسط العربية؟ الشركة اتصلوا بيا وبولاء وهددوا بسحب العربية ورفع قضية.. يرضيكي أختك تتجرجر في المحاكم؟
ولاء كملت وهي بتعيط التمثيلية اللي أمي قالت عليها في الجروب
يا أميرة، أنا مدرسة والبرستيج بتاعي هيضيع.. والعيال، هوديهم الحضانة إزاي والمصاريف اتلغت؟ المدير اتصل بيا قالي إن السيستم مطلع إن الدفع اترفض.
قعدت على الكرسي، وحطيت رجل على رجل، وشربت بقة من قهوتي
والله يا ولاء، البرستيج بيتبني بالتعب مش بفلوس المغفلة. أما بالنسبة للعربية، فبسيطة.. بيعيها وسددي القرض، واركبي ميكروباص زي بقية الخلق، يمكن تحسي بالناس اللي كنتِ بتمصي دمهم.
هاني وشه احمرّ وبدأ يهدد
أنتِ فاكرة إنك لما تقطعي عننا الفلوس هتلوي دراعنا؟ إحنا عيلتك، ومن حقنا فيكي شرعًا وعرفًا إنك تشيلينا، وإلا هجيبلك كبار العيلة والمنطقة يربوكي.
ضحكت بصوت عالي، ضحكة هزت الحيطان
كبار العيلة؟ تقصد اللي أنت كنت بتبعتلهم سكرين شوتس التحويلات وتتريق عليا وتقول المنقذة العبيطة بعتت نصيبها في الجمعية؟ يا هاني، أنا معايا ورق بكل مليم دخل جيوبكم، ومعايا رسايل الجروب اللي تثبت إنكم كنتوا بتنصبوا عليا بالتمثيل.. لو حابب نكبر الموضوع ونخلي الفضايح بجلاجل، أنا جاهزة.
ولاء لما لقت الكلام مش جايب نتيجة، غيرت لهجتها
طيب يا أميرة، بلاش إحنا.. أمك! أمك اللي السكر عندها عليّ من امبارح وضغطها واصل للسما.. ينفع تسيبيها من غير علاج ولا رعاية؟
قلبي وجعني لثانية، بس افتكرت جملة أمي ارمو الكلمتين بتوعكم واعيطوا.. العياط بيجيب معاها من الآخر.
بصيت لولاء وقولت
ماما عندها معاش، وعندها ابن شحط زيك يا هاني، وبنت ست بيت شاطرة زيك يا ولاء. شيلوا عنها زي ما كنت بشيل.. أنا خلاص، استقلت من دور السند.
طلعتهم بره وقفلت الباب، بس اللعب بقى تقيل. الساعة 4 العصر، لقيت بوستات نازلة على الفيسبوك من حساباتهم.. صور عائلية قديمة وعليها كلام من نوعية المال بيغير النفوس، أصعب طع,,نة لما تيجي من أقرب الناس ليك عشان خاطر شوية ورق.
النقاش
التعليقات والردود (0)
سجّل الدخول للمشاركة في النقاش. تسجيل الدخول
لا توجد تعليقات بعد — كن أول من يشارك رأيه.